مراجعة شخصية لسنة 2019

مشاهدة مشاركة واحدة (من مجموع 1)
  • الكاتب
    المشاركات
  • #317
    Maher Rayes
    عضو

    سنة 2019 كانت من احسن السنين بالنسبة للانميات اللي تم اصدارها وممكن أسوء سنة بالنسبة لصناعة الانمي والتغييرات اللي عم تصير فيها. شخصياً كنت متصل باغلب الاشياء المتعلقة بصناعة الانمي هالسنة فكان الموضوع مزعج فعلاً بس هيك امور لازم تصير كل فترة ولح تزيد حسب توقعي الفترة الجاية مع انفتاح صناعة الانمي عالجمهور العالمي.

    المهم كوني بحب اعمل ليستات توب فلح احكي بهالبوست عن أفضل وأسوء الاشياء اللي مريت عليها هالسنة بمجال الانمي على شكل ليستات صغيرة وشوية حكي معن. ما بحب ضل عم عيد هالشغلة بس لح ذكر انو هالليستات هي تفضيلات شخصية مبينة على آراء مرتبطة بالاعمال نفسها وشو صار فيها. ممكن توافقني او لا بس لا تستغرب انو حدا لقى انميك المفضل ما منيح (لأسباب منطقية). لنبلش بالاشياء السيئة:

    أسوء الأشياء اللي مرت عليها صناعة الانمي بـ 2019

    3- خداع فريق إنتاج أنمي Hoshiai no Sora
    أنمي هوشياي نو سورا كان من أكتر الأعمال الطموحة هالسنة كاملة من فريق عمل بشغف كبير ليعمل قصة بتعلق على حالات اجتماعية مهمة كتير. هاد للاسف ما قدر يعالج القضايا المطروحة اصلا بسبب قرار لجنة الانتاج بتحويل الانمي من 24 حلقة ل 12 حلقة بوقت متاخر كتير لدرجة فريق العمل ما قدر حتى يعدل عليه وانترك مقطوع بالنهاية مع حلقة اخيرة من اكتر الاشياء اللي فيها انزعاج شفتو من فترة (حتى بتلاحظو انقطاع الاوبينينغ و الايندنغ المقصود والنهاية مع الكليفهانغر)

    2- خداع استديو غاينكس للمخرج هيدياكي أنو ودمار الاستديو
    قصة طويلة ما لح فوت فيها .. يلي مهتم ممكن يقرا هالمقال عنها:

    هيديكي آنو يستنكر تواجد أي روابط بينه وبين رئيس استوديو Gainax الذي تم القبض عليه ويناقش ماضيه المظلم مع الاستوديو

    1- حريق استديو كيوتو انيميشن
    اكتر حدث مأساوي صار بالصناعة بالعقد وممكن عالاطلاق .. مات بسبب هالشي نصف عاملين الاستديو واحترق المبنى مع معظم المعدات فيه وجيل كامل من الرسامين انتهى إمّا ميّت أو مع إعاقات .. الشي الوحيد المنيح اللي طلع منو هو حملة التبرعات اتجاه الاستديو اللي جابت فوق مليونين دولار
    أسوء أعمال الأنمي بـ 2019

    شخصياً ما عندي صبر لشوف أعمال سيئة بس كل فترة وفترة بشوف شي انمي ما عاجبني للنهاية حتى ما افقد اتصالي بالاعمال اللي اعتبرها سيئة. حكيي هون بس عن الانميات اللي وصلت لنهايتا:
    3- ون بنش مان موسم 2
    اتكلمت عنو بشكل مفصل سواء على تويتر او فيديو على قناة كاواي. في كتير اشياء غلط صارت بهالانمي بس اذا في شغلة بيوضحها فهو انو ما في قيمة لعمل بصري بدون ما تجيب الجانب البصري صح. ون بنش مان 2 ما كان بس نزول بالمستوى عن الاول، هالانمي كان اهانة
    فيديو: https://www.youtube.com/watch?v=F2WMJZmPFMA

    2- شيلد هيرو
    الشي اللي بلش مشان يجيب جماعة ال incels تحول لشي من اكتر الاشياء الجينيرك اللي شفتا من فترة طويلة مع انتاج مو متماسك ابدا. مو بس بيتجاهل كل فرصة بيقدر فيها يصير جيد بس صعب حتى اتخيل انو في ناس ممكن تهتم فيه كشي اكتر من تضييع وقت.. هاد من اسهل الانميات اللي ممكن اعملها Break down لاشرح شو سيء فيه بكل مشهد بس قررت ما ضيع وقتي اكتر مما ضيعتو عليه

    1-شوكوغيكي نو سوما 4
    انسى كل themes والمواضيع القابلة للنقاش وحتى التكرار الميت وكل شي. شوكوغوكي نو سوما كل موسم بينزل بالمستوى مسافة مو طبيعية بس ما توقعتو يوصل لمرحلة انو يكون مكسور حتى تقنيا. ما في مشهد او مقطع صوتي بمكانو بهالانمي حتى الحوارات disconnected لدرجة بتضحك. هالانمي اتجاوز موضوع النسخ من المانغا صار ما في محاولة حتى ليعملو شي كويس. طالع متل الحريقة اللي ما بتقدر تبعد عيونك عنها ولهالسبب كملتو نوعا ما

    أكتر صنّاع الأنمي المهمين بـ 2019

    هالسنة ما كان في شخص معين جديد او قديم بانتشار عالي. بس في كم محاولة واشياء مميزة صارت من ناس كتيرة اهمهم بنظري:

    3- شينيتشيرو واتانبي مخرج أنمي كارول اند تيوزداي
    واتانابي كان شغلو دائما بصدى عالمي بس بعد غيابو عن الساحة لفترة طويلة كانت الرجعة بكارول اند تيوزداي منعشة كتير. مع انمي موجه لجمهور عالمي ومالو كتير ارتباطات بثقافة الاوتاكو، تجربة حلوة كتير.

    2- ماي تودا مصممة شخصيات البطل الحذر
    فيه فيديو قادم عنها بس ماي قدرت تحول رواية ايسيكاي ميديوكر كتير لعمل ممتع للمشاهدة بمجرد شحنو بتعابير ورياكشنات كوميدية ومبالغ فيها. هي من الناس القليلة بالصناعة اللي بترفع الصفات الكرتونية بعملها وهاد بحترمو.

    1-كونيهيكو ايكوهارا مخرج ومؤلف سارازانماي
    اتكلمت عنو بشكل كبير. ايكوهارا بيصنع اكتر الاشياء الغريبة اللي ممكن تشوفا باي انمي بس كلو بهدف وتوجه معين مو مناسب للكل. بعد انمي السابق الو (يوري كوما اراشي) يلي ما كتير قدرت اهتملو كانت شغلو بسارازانماي ورجعتو لايام اوتينا شي عظيم كتير. بعد ما اسس استديو بتمنى يطلعلنا اعمال اكتر بالمستقبل

    أفضل أوبينينغ بـ 2019

    3- أوب بيستارز
    فن ال stop motion بيرجع باحلى شكل بأنمي بيستارز مع موسيقى جاز ممتازة واوب من اكتر الاشياء الفريدة اللي شفتا من فترة طويلة.

    2- أوب كارول اند تيوزداي الاولى
    أول ما عرفت انو هالاوب من اخراج Bahi JD كنت متاكد انها حتكون شي مميز وما خاب ظني ابدا. منقولة بطريقة مشابهة للالوان المائية ومع شغل كتير مواهب (ماخودين من شبكة المخرج على تويتر)

    1- أوب موب سايكو 100 الموسم الثاني
    هي easy pick كتير .. كشخص بيهتم كتير بمجال الانيميشن انك تشوف اوب معمولة للاحتفال بمعظم انواع طرق التحريك القديمة والحديثة اكيد حيخليها شي ما بيتكرر .. شي تاني كمان بيستحق المدح هو الجهد المحطوط بدمج كل اساليب التحريك المستخدمة فيها لشي واحد ما بتحسو منفصل عن السلسلة. احترام كبير للمخرج والستوريبوردر هون تاتشيكاوا يوزورو (مخرج الانمي نفسو) .. ايضا ما بنسى الغنية من فرقة Sajou no hana الي نوعا ما كل اغانيهم توب
    عملت تحليل الها ممكن قراءته هنا: https://qawaii.me/maherr/mob-psycho-100-ii-production-01

    أفضل ايندينغ بـ 2019

    3-ايندينغ Fire force الاولى
    عكس الاوب المخبصة بشكل مو طبيعي (وهالشي بينطبق عالانمي نفسو). الايندينغ هون بتوجه واحد ومتماسكة اكتر بكتير مع غنية رائعة. كلها من شغل Taiki Konno لوحده

    2-ايندينغ Hoshiai no sora
    ايندنغ رقصة كاملة. بس تفاصيلها بتحكي كتير. الرقصة ماخودة من رقصات شعبية مشهورة عاليوتيوب و مزبطة لتحاكي حيوية كل شخصية من العمل وكيف ردود فعلها. معمولة كلها من الانيميتور Ebata (يلي اشتغل على انمي السلايم)

    1-ايندينغ Sarazanmai
    لما طلعت تريلرات الانمي كانت محطوطة على شكل شخصيات انمي تم اسقاطا بالعالم الحقيقي .. الانمي ما كان هيك بس هي الايندينغ عملت كل شي كنت بدي ياه من هالتريلرات. جدا مميزة ومع غنية رهيبة من فرقة Peggies


    ..

    أفضل أنميات 2019

    اخيرا الفقرة الاهم:

    5- فينلاند ساغا
    بعد ما شفت اول 6 حلقات منا لانمي قررت انه الافضل اجمعه وشوفه بقعدة وحدة وكان هاد الخيار الصح. النتيجة اللي طلعت فيها انو ما كان شي متماسك قد توقعاتي بس اذا منشوف بس ال Highs تبع العمل فهو شي بيستاهل ينشاف بشكل كبير. وممكن تجربتو كمانغا افضل
    مقال وائل بيشرح الاشياء اللي بحبا وبكرها بالعمل كتابيا (خصوصا نقطة المبالغة وعدم الثبات فيها) .. الانتاج بالعمل كان فيه نفس المشكلة نوعا ما بانو مو ثابت ابدا وبعض السي جي جدا مزعج بينما بعضو التاني كان مدموج بشكل ممتاز
    بيضل شي استمتعت بمشاهدتو ومع اكتمال الارك الاول بالانمي بشكل مرضي مع نهايتو قدر يوضحلي انو ما حيكون شي بيسحب البلوت وبيمط وبيعيد فيها لدرجة الموت
    المقال: https://qawaii.me/waelsaitama/vinland-saga

    4- كارول اند تيوزداي
    كارول اند تيوزداي مو اكتر انمي مبتكر بس الشي اللي بيعملو بيطبقو بشكل ممتاز وهي العروض الموسيقية اللي بتحمل شعور غربي كبير. البلوت بشكل عام عذر لهالعروض بس مولها شي مزعج كمان ومع تصاميم شخصيات ممتازة وانيميشن ممتاز بالعروض قدر يجذب انتباهي للنهاية

    3-سارازانماي
    مشاهدة سارازانماي ما بنصح فيها اي شخص جديد على انميات ايكوهارا او اي شخص عندو حساسية من مشاهد مجنونة او نقاش مواضيع حساسة
    بس لما تتجاوز هالشي بتقدر تشوف العمل بشكل تاني. سارازانماي مبتكر، بيموت ضحك، وبيناقش مواضيع مهمة متعلقة بالعلاقات الاجتماعية بشكل مرضي جدا. بتضل الهزلية الغريبة تبعو اكتر شي بيميزو ومع انتاج عظيم من البداية للنهاية قدر يكون من افضل 3 اعمال شفتا هالسنة واكترهم تفرّداً

    2-بيستارز
    عندي نية بكتابة مقالات عنو بس كاختصار بيستارز عمل من برا عن قصة حب رومنسية محرمة بس مع الدخول فيه شوية بتلاقي تفاصيل مو طبيعية بالعالم واسقاطات اجتماعية عليه بترفع قيمتو كتير. اذا في شي ممكن اوصف فيه العمل فهو انو ذكي كتير وواعي بحالو وشخصياتو عبارة عن امتداد ممتاز للقصة
    هالشي ما بيوقف هون انما بيمتد لانتاج مبتكر كتير مع استديو اورانج اللي اثبت انو ما في اي حجة لمنتجين اعمال السي جي انو يصنعو انميات سيئة. السي جي هو مجرد وسيلة وما ممكن يغني عن الجانب الفني عند فريق العمل وهون فينك تلاحظ مقاطع كتيرة بترجع للتو دي لتظهر بطريقة معينة ما ممكن الثري دي ينقلها. احترام كبير لكل مين اشتغل عليه وبانتظار الموسم التاني

    1-موب سايكو 100 الموسم الثاني
    الاختيار المتوقع بالنسبة الي. بس موب سايكو فعلا بيتجاوز اي شي شفتو هالسنة وبمسافة كويسة. ما بيعرض بس واحد من احسن تطور الشخصيات اللي شفتو باي عمل بس بيخدم هالشي كمان باحسن انتاج مر على صناعة الانمي التلفزيوني من خمس سنين وكوميديا ممتازة من المؤلف ONE.
    معظم الاعمال بتكون يا ممتازة او ثابتة .. موب سايكو كان الاثنين وشي لح اتذكرو لسنين
    مقالات اكثر عن موب سايكو:
    https://qawaii.me/maherr/mob-psycho-100-analysis/
    https://qawaii.me/maherr/mob-psycho-100-ii-production-01/
    https://qawaii.me/maherr/mob-psycho-100-ii-production-02/

    ……
    شو أعمالكم المفضلة والاسوء بسنة 2019؟ شاركونا بالتعليقات

مشاهدة مشاركة واحدة (من مجموع 1)
  • يجب تسجيل الدخول للرد على هذا الموضوع.